ချင့်ချိန်စားသောက်လေ ကျန်းမာအသက်ရှည်လေ

ဖွံ့ဖြိုးတိုးတက်လာတာနဲ့အမျှ စားချင်စိတ်ဖြစ်ပေါ်အောင် ပုံစံမျိုးစုံ၊ အရသာမျိုးစုံနဲ့ ဖန်တီးထားကြတဲ့ အစားအသောက်တွေကလည်း စျေးကွက်အတွင်းမှာ တစ်နေ့ထက်တစ်နေ့ အလွန်များပြားလို့လာနေပါတယ်။ ဒီလိုမျိုး အစားအသောက်တွေပေါများလာတာဟာ အစားစားရတာကြိုက်နှစ်သက်ကြတဲ့သူတွေအဖို့တော့ ကြိုက်နှစ်သက်စရာကောင်းတဲ့ အချက်ဖြစ်သော်လည်း လိုတာထက်ပိုပြီး အလွန်အကြူုးစားသောက်မယ်ဆိုရင်တော့ အချိန်ကြာလာတဲ့အမျှ ခန္ဓာကိုယ်အတွက် ဆိုးကျိုးတွေဖြစ်ပေါ် လာစေနိုင်ပါတယ်။ ဒါကြောင့် ကျန်းမာရေးပညာရှင်တွေက အစားအသောက်ကိုစားသုံးတဲ့အခါမှာ ချင့်ချိန်စားသုံးမှုပုံစံက ကျန်းကျန်းမာမာနဲ့ အသက်ရှည်စေနိုင်တဲ့ နည်းလမ်းတစ်ခုဖြစ်တယ်လို့ ဆိုထားကြပါတယ်။

ဒီတစ်ပတ် “Health Tips” ကဏ္ဍလေးမှာတော့ အစားအသောက်ကို ဘယ်လိုပုံစံမျိုးနဲ့ ချင့်ချိန်စားသုံးတာက အသက်ရှည်ကျန်းမာစေတဲ့ နည်းလမ်းကောင်းဖြစ်တယ်ဆိုတာကို တင်ဆက်ပေးလိုက်ပါတယ်။

ကျန်းမာရေးပညာရှင်တွေ၊ သုတေသီတွေရဲ့ ရှာဖွေတွေ့ရှိချက်တွေအရဆိုရင် ကယ်လိုရီပါဝင်တဲ့အစားအသောက်တွေကို ရှောင်ကြဉ်တဲ့စားသောက်မှုပုံစံဟာ ခန္ဓာကိုယ်အတွက်ဆိုးကျိုးတွေဖြစ်စေနိုင်တဲ့ အသက်အရွယ်ဆိုင်ရာရောဂါတွေကို ခုခံကာကွယ်ပေးနိုင်ရုံသာမက စိတ်ပိုင်းဆိုင်ခံစားချက်တွေကိုလည်း‌ ကောင်းမွန်စေနိုင်တယ်လို့ သိရပါတယ်။ ဒါကြောင့်လည်း ဒီစားသောက်မှုပုံစံက ကျန်းကျန်းမာမာနဲ့ အသက်ရှည်စွာနေထိုင်နိုင်တဲ့နည်းလမ်းကောင်းတစ်ခုဖြစ်ပြီး တကယ်လို့ သင့်အနေနဲ့ သင့်ရဲ့ဘ၀သက်တမ်းကိုရှည်လျားစွာနေထိုင်လိုပါက ဒီနည်းလမ်းကိုလိုက်နာကျင့်သုံးသင့်တယ်လို့လည်း ဆိုထားကြပါတယ်။

နောက်ထပ်လေ့လာမှုတစ်ခုမှာတော့ အဲဒီလိုမျိုးကယ်လိုရီပါဝင်တဲ့အစားအသောက်တွေကို (၂) နှစ်အတွင်းမှာ ၁၅ ရာခိုင်နှုန်းမျှ လျှော့ချပေးခြင်းက အိုမင်းရင့်ရော်မှုကို နှေးကွေးစေနိုင်ပြီး ကင်ဆာ၊ ဆီးချိုနဲ့ အယ်လ်ဇိုင်းမာတို့လိုမျိုး ရောဂါတွေကိုလည်း ကာကွယ်နိုင်တယ်လို့ဖော်ပြထားတာကိုတွေ့ရပါတယ်။ အကြောင်းအရင်းကတော့ ကယ်လိုရီစားသုံးမှုကို ရှောင်ကြဉ်ခြင်းက ကိုယ်ခံအားစနစ်ကိုကောင်းမွန်စေကာ ဇီ၀ဖြစ်စဉ်နှုန်းကိုနှေးကွေးစေနိုင်ပြီး နာတာရှည်ရောဂါတွေနဲ့ ဆက်စပ်မှုရှိနေတဲ့ Free Radicals တွေကိုလည်း လျှော့ချပေးနိုင်တဲ့အတွက်ကြောင့်ပါပဲ။ ဒါ့အပြင် ကယ်လိုရီစားသုံးမှုကို ၁၄ ရာခိုင်နှုန်းမျှလျှော့ချထားတဲ့ အရွယ်ရောက်ပြီးသားလူတွေမှာဆိုရင် လေပြွန်ရဲ့ အရှေ့ဘက်မှာရှိတဲ့ သိုင်းမတ်ဂလင်း (Thymus Gland) လုပ်ဆောင်မှုကို ပိုမိုအားကောင်းစေနိုင်ပါတယ်။ အဆိုပါ သိုင်းမတ်ဂလင်းဟာဆိုရင်တော့ ဖွံ့ဖြိုးတဲ့ Mature T Cells တွေကိုထုတ်လုပ်‌ပေးပြီး အဲဒီကနေထွက်ရှိလာတဲ့ ကိုယ်ခံအားကောင်းမွန်စေတဲ့ဆဲလ်တွေကတော့ ရောဂါပိုးမွှားတွေကို တိုက်ထုတ်ပေးတာဖြစ်ပါတယ်။

ကယ်လိုရီပါဝင်တဲ့အစားအသောက်တွေကို ရှောင်ကြဉ်တဲ့အချိန်အတွင်းမှာတော့ ခန္ဓာကိုယ်အတွက်လိုအပ်တဲ့ အာဟာရဓာတ်တွေကို ဖြည့်တင်းပေးနိုင်တဲ့ ဆန်ကြမ်း၊ ဂျုံကြမ်း၊ သစ်သီး၀လံ၊ ဟင်းသီးဟင်းရွက်၊ အစေ့အဆန်၊ သံလွင်ဆီနဲ့ ငါးအစရှိတာတွေကို စနစ်တကျစားသုံးပေးသင့်ပါတယ်။ ဒီလိုမျိုးကျန်းမာရေးနဲ့ကိုက်ညီမှုရှိတဲ့အစားအစာတွေကို ပိုမိုစားသုံးတဲ့သူတွေမှာဆိုရင် နှလုံးသွေးကြောရောဂါဖြစ်ပွားမှုနည်းပါးခြင်းနဲ့ အသက်ရှည်ကျန်းမာခြင်းတို့လိုမျိုး အကျိုးကျေးဇူးတွေဖြစ်ထွန်းတာကို တွေ့ရပါတယ်။

ဒါပေမဲ့ သတိထားသင့်တာတစ်ခုက ဂျုံကြမ်း၊ ဆန်လုံး‌ညိုနဲ့ ကွေကာအုပ်တို့လိုမျိုး အစားအသောက်တွေကိုစားသုံးတဲ့အခါမှာ အကြမ်းထည်တွေကိုဖြူဖွေးသွားအောင် ဖွပ်ချေခြင်းမပြုလုပ်သင့်ပါဘူး။ အကြောင်းကတော့ အဲဒီအစားအစာတွေရဲ့ အပေါ်ယံမှာ ဖွဲအလွှာ၊ အလယ်မှာ ကစီဓာတ်အလွှာနဲ့ အတွင်းမှာ ဗီတာမင်နဲ့ သတ္တုဓာတ်တွေပါဝင်တဲ့အတွက်ကြောင့်ဖြစ်ပါတယ်။ ဒါကြောင့် အဲဒီအလွှာတွေဟာဆိုရင် ကိုလက်စထရောကိုကျဆင်းစေခြင်း၊ ဆီးချိုရောဂါဖြစ်ပွားနိုင်မှုကိုလျှော့ချပေးနိုင်ခြင်းနဲ့ နှလုံးရောဂါကို ကာကွယ်ပေးနိုင်တဲ့ ကောင်းကျိုးရလဒ်တွေရှိတယ်လို့ဆိုနိုင်ပါတယ်။

တကယ်လို့များ သင်က စားသုံးတဲ့အရသာကို ပိုမိုကောင်းမွန်စေလိုတဲ့ ရည်ရွယ်ချက်နဲ့ အကြမ်းထည်တွေကိုဖယ်ရှားလိုက်မယ်ဆိုရင်တော့ အဲဒီအမျှင်ဓာတ်တွေနဲ့ ဗီတာမင်ဓာတ်တွေကို ဖယ်ရှားလိုက်တဲ့သဘောဖြစ်သွားမှာပဲဖြစ်ပါတယ်။ သုတေသနပြုလုပ်သူတွေရဲ့တွေ့ရှိချက်တစ်ခုအရဆိုရင် ဒီလိုမျိုးအစားအစာတွေကို တစ်ပတ်မှာ ၄ ကြိမ်ကနေ ၇ ကြိမ်အထိ စားသုံးတဲ့သူတွေဟာ လုံး၀မစားတဲ့သူတွေထက် ၃၁ ရာခိုင်နှုန်း အသက်ပိုရှည်တယ်လို့ သိရပါတယ်။

သစ်သီး၀လံတွေနဲ့ ဟင်းသီးဟင်းရွက်တွေကတော့ ကျန်းမာရေးအတွက်အကျိုးရလဒ်တွေများစွာရှိတယ်ဆိုတာကို အထူးတလည် ရှင်းပြနေစရာလိုမယ်မထင်ပါဘူး။ ဒါပေမဲ့ အာဟာရပညာရှင်တွေကတော့ အစာစားတဲ့အခါတိုင်းမှာ သဘာ၀အတိုင်း ဓာတ်တိုးဆန့်ကျင်ပစ္စည်းတွေ၊ ဗီတာမင်တွေပါဝင်တဲ့ အသီးအရွက်ကို ပန်းကန်ရဲ့တစ်ဝက်မျှ ဖြည့်တင်းစားသောက်ပေးသင့်သလို ဖျော်ရည်သဖွယ် ပြင်ဆင်ပြုလုပ်ပြီးတော့လည်း သောက်သုံးပေးသင့်တယ်လို့ အကြံပြုထားကြပါတယ်။

ငါးတွေထဲမှာဆိုရင်တော့ အိုမီဂါ-၃ အဆီအက်ဆစ်ဓာတ်ကြွယ်၀တဲ့ ငါးအမျိုးအစားတွေ (ဥပမာ – ဆော်လ်မွန်၊ ဆာဒင်း၊ တူနာ၊ မက်ခရဲလ်၊ ငါးမြင်း၊ ငါးတန်) ကို ရွေးချယ်စားသုံးပေးသင့်ပြီး အဲဒီအဆီအက်ဆစ်မှာဆိုရင် သွေးတိုးကိုထိန်းညှိပေးနိုင်တဲ့ အာနိသင်တွေရှိတယ်လို့ဆိုကြပါတယ်။ ဒါကြောင့် ဒီလိုမျိုးငါးတွေကို တစ်ပတ်မှာ အနည်းဆုံးနှစ်ကြိမ်ခန့် စားသုံးပေးသင့်ပါတယ်။ 🫘အဆီပါဝင်မှုနည်းပါးပြီး ကျန်းမာရေးအတွက်အထောက်အကူပြုတဲ့ ပဲအမျိုးမျိုးဟာဆိုရင်တော့ အမျှင်ဓာတ်ကြွယ်၀သလို ပရိုတင်း (ခေါ်) အသားဓာတ်တွေလည်းအဓိကပါဝင်တာဖြစ်ပါတယ်။ ဒါပေမဲ့ ပဲတွေကိုစားသုံးပြီဆိုရင် လတ်လတ်ဆတ်ဆတ် ချက်ပြုတ်စားသောက်တာကအကောင်းဆုံးဖြစ်ပြီး ဒီလိုချက်ပြုတ်တဲ့အခါမှာတော့ ဆားတွေအများကြီးမထည့်မိစေဖို့ သတိပြုသင့်ပါတယ်။

အစေ့အဆန်စားသုံးမှုနဲ့ပတ်သက်လို့ပြောရမယ်ဆိုရင်တော့ တချို့တွေက အစေ့အဆန်တွေ (နေကြာစေ့၊ ဖရုံစေ့) မှာ ကယ်လိုရီပါဝင်မှုများပြားတာကြောင့် ၀မှာစိုးရိမ်ကြောက်ရွံ့ပြီးရှောင်ကြဉ်တတ်ကြတာကိုတွေ့ရပါတယ်။ ဒါပေမဲ့ အဲဒီလိုမျိုး အစေ့အဆန်တွေမှာပါဝင်တဲ့ အဆီဟာဆိုရင် ပြည့်၀ဆီမဟုတ်တာကြောင့် စိတ်ချလက်ချစားသုံးနိုင်ပြီး သုတေသီတွေကတော့ အငန်ဓာတ်မလွန်ကဲတဲ့ အစေ့အဆန်တွေကို တစ်နေ့လျှင် လက်တစ်ခုပ်စာမျှစားသုံးပေးသင့်တယ်လို့ ဆိုထားကြပါတယ်။

ဒီစားသောက်မှုပုံစံနဲ့ပတ်သက်လို့ အဓိကမှတ်သားထားသင့်တဲ့အချက်က ကယ်လိုရီစားသုံးမှုပမာဏကို တတ်နိုင်သမျှ လျှော့ချဖို့ဖြစ်တာကြောင့် ပရိသတ်ကြီးတို့လည်း အစားတစ်ခါစားခါနီးတိုင်းမှာ ဒီအချက်လေးကို သတိပြုဆင်ခြင်နိုင်ကြဖို့ မျှော်လင့်ပါတယ်။ အသက်ရှည်ကျန်းမာစေနိုင်တဲ့ ချင့်ချိန်စားသောက်မှုပုံစံအကြောင်းကို ဗဟုသုတအနေနဲ့ တင်ဆက်ပြီးဖြစ်တာကြောင်း ပရိသတ်ကြီးတို့လည်း သိရှိသွားပြီလို့ ယုံကြည်ပါတယ်နော်။ နောက်တစ်ပတ်မှာပြန်ဆုံကြမယ်။