တစ်နေ့တာအတွက် အရေးကြီးဆုံးသော အစာအာဟာရ (သို့မဟုတ်) မနက်စာ

ဒီနေ့လိုခေတ်အချိန်အခါမှာဆိုရင်တော့ လှုပ်ရှားသွားလာနေကြတဲ့လူငယ်၊ လူရွယ်တွေအများစုဟာ မနက်စာကို အချိန်သေချာပေးပြီး စားလေ့စားထမရှိတော့ဘဲ အချိန်ကုန်သက်သာစွာနဲ့ လွယ်လင့်တကူဗိုက်ပြည့်သွားစေမယ့် အစားအစာမျိုးတွေကိုသာ ရွေးချယ်စားသုံးလာကြတာကို တွေ့ရပါတယ်။ တကယ်တော့ တစ်နေ့တာလုံးကို ခွန်အားအပြည့်အ၀နဲ့ ဖြတ်သန်းနိုင်ဖို့အတွက်ဆိုရာမှာ မနက်ခင်းစာကို ဗိုက်ပြည့်ရုံအတွက်သာမဟုတ်ဘဲ အာဟာရပြည့်၀စွာနဲ့ စားသောက်တတ်ဖို့ကလည်း အရေးကြီးတဲ့အခန်းကဏ္ဍကနေ ပါဝင်ပါတယ်။ ဒါကြောင့်လည်း “မနက်စာကို ရှင်ဘုရင်လိုစားပါ” ဆိုတဲ့စကားကရှိလာတာဖြစ်ပါတယ်။ ဒီတစ်ပတ်အတွက် Health Tips ကဏ္ဍမှာတော့ မနက်စာကို ကျန်းမာရေးနဲ့ညီညွတ်အောင် စားသုံးတဲ့အခါမှာ ဘယ်လိုအစားအစာမျိုးတွေကို ရွေးချယ်စားသုံးသင့်သလဲ၊ မနက်စာကို ပုံမှန်စနစ်တကျစားသုံးခြင်းကြောင့် ဘယ်လိုမျိုးကျန်းမာရေးအကျိုးကျေးဇူးတွေရရှိလာစေနိုင်သလဲဆိုတဲ့အကြောင်းတွေကို စုစည်းတင်ဆက်ပေးလိုက်ပါတယ်။

တကယ်လို့ သင့်အနေနဲ့ မနက်စာကို အာဟာရပြည့်၀စွာနဲ့ စားသုံးပေးမယ်ဆိုရင်တော့ အောက်ဖော်ပြပါ အကျိုးကျေးဇူးတွေကို သိသာထင်ရှားစွာရရှိလာနိုင်မှာဖြစ်ပါတယ်။ အဲဒါတွေကတော့ …

(၁) ဆီးချိုရောဂါဖြစ်ပွားမှုကိုလျှော့ချပေးနိုင်ခြင်း။
မနက်စာကို ပုံမှန်မစားဘူးဆိုရင် အင်ဆူလင်တွေလျော့နည်းလာတာကြောင့် ဆီးချိုရောဂါဖြစ်ပွားမှုနှုန်းကို မြင့်တက်လာစေနိုင်ပါတယ်။ ဒါကြောင့် အာဟာရဓာတ်ပြည့်၀တဲ့မနက်စာကို နေ့စဉ်ပုံမှန်စားသုံးပေးမယ်ဆိုရင်တော့ အင်ဆူလင်တွေကလည်းတိုးလာနိုင်ပြီး ဆီးချိုရောဂါဖြစ်ပွားမှုကိုတော့ ၃၀ ရာခိုင်နှုန်းအထိလျှော့ချပေးနိုင်ပါတယ်။

(၂) နှလုံးကျန်းမာရေးကိုကောင်းမွန်စေခြင်း။
မနက်စာစားသုံးခြင်းကြောင့်ရရှိလာနိုင်တဲ့ အကျိုးကျေးဇူးတစ်ရပ်ကတော့ နှလုံးကျန်းမာရေးကိုကောင်းမွန်လာစေနိုင်တာပါပဲ။ သုတေသီတွေရဲ့ရှာဖွေတွေ့ရှိချက်အရဆိုရင် မနက်စာကိုနေ့တိုင်းပုံမှန်စားသုံးသူတွေက မနက်စာမစားတဲ့သူတွေထက် နှလုံးရောဂါဖြစ်ပေါ်နိုင်ချေကို ၂၇ ရာခိုင်နှုန်းအထိလျှော့ချပးနိုင်တယ်လို့ သိရပါတယ်။
တကယ်လို့သင့်အနေနဲ့ မနက်စာကို ပုံမှန်မစားဘူးဆိုရင်တော့ နာတာရှည်ရောဂါတွေဖြစ်တဲ့ လေဖြတ်ခြင်းနဲ့ သွေးတိုးခြင်းတွေလည်း ဖြစ်စေနိုင်ပြီး သွေးတွင်းသကြားဓာတ်ကိုလည်းလျော့ကျစေကာ ခေါင်းတစ်ခြမ်းကိုက်ခြင်းကိုဖြစ်ပေါ်စေနိုင်ပါတယ်။

(၃) သရေစာစားသုံးမှုကို လျော့ကျစေခြင်း။
လေ့လာမှုတွေအရဆိုရင် မနက်စာစားထားတဲ့သူတွေမှာ မစားတဲ့သူတွေထက် သရေစာစားသုံးမှုလျော့နည်းတာကိုတွေ့ရပါတယ်။ သရေစာစားနည်းမှုလျော့နည်းခြင်းအားဖြင့် အ၀လွန်ခြင်း၊ ဆီးချိုသွေးချိုဖြစ်ခြင်းနဲ့ ကင်ဆာဖြစ်ခြင်းတို့ကိုလျော့ကျစေနိုင်တာကြောင့် ဒီအချက်ကတော့ ကျန်းမာရေးအတွက်ရော၊ ငွေကြေးအတွက်ပါ အဆင်ပြေချောမွေ့တဲ့အကျိုးရလဒ်ဖြစ်တယ်လို့ ဆိုရမှာပါ။

(၄) တစ်နေကုန်ဆာလောင်မှုကို လျှော့ချပေးနိုင်ခြင်း။
မနက်စာကိုပုံမှန်စားပေးခြင်းဖြင့်ရရှိလာနိုင်တဲ့ အကျိုးကျေးဇူးကောင်းတစ်ရပ်ကတော့ ဆာလောင်မှုကိုလျှော့ချပေးပြီး စားတဲ့အချိန်မှာလည်း ပမာဏအများကြီးကို မစားမိစေတော့တာပါပဲ။ ဒီလိုဆိုရင် အစားအများကြီးစားမိခြင်းကြောင့်ဖြစ်ပေါ်လာနိုင်တဲ့ အစာမကြေမှုတွေကိုလည်း ဖြစ်မလာစေတော့ပါဘူး။

(၅) ကိုယ်အလေးချိန်ကျဆင်းခြင်း။
ဒီတစ်ချက်ကိုကတော့ အလှအပမြတ်နိုးသူတွေ၊ ကိုယ်အလေးချိန်ထိန်းသိမ်းလိုသူတွေ အကြိုက်တွေ့ကြမှာအသေအချာပါပဲ။ ဟုတ်ပါတယ်။ မနက်စာကိုအချိန်မှန်သေချာစားသုံးခြင်းဟာ တစ်နေကုန်ဆာလောင်မှုကိုလျှော့ချပေးနိုင်တာကြောင့် ကိုယ်အလေးချိန်ထိန်းသိမ်းဖို့အတွက် အထောက်အကူပြုတာကိုတွေ့ရပါတယ်။ ဒါကြောင့်လည်း ကျွမ်းကျင်သူတွေက ကိုယ်အလေးချိန်လျှော့တဲ့အခါမှာ မနက်စာကို သေချာစားသုံးပေးဖို့ အကြံပေးကြတာဖြစ်ပါတယ်။ ဒါပေမဲ့ မနက်စာစားတဲ့အခါမှာတော့ အာဟာရဓာတ်ပြည့်၀တဲ့အစားအစာတွေကိုသာ ရွေးချယ်စားသုံးသင့်ပါတယ်။

(၆) မှတ်ဉာဏ်စွမ်းရည်တိုးတက်စေခြင်း။
ကာဗိုဟိုက်ဒရိတ်ဓာတ်ပါဝင်တဲ့ မနက်စာက သင့်ရဲ့ ဦးနှောက်စွမ်းဆောင်ရည်တွေကို တိုးတက်စေဖို့အတွက် အကူအညီပေးတာကြောင့် အာဟာရဓာတ်ပြည့်၀တဲ့ မနက်စာစားသုံးခြင်းဟာ မှတ်ဉာဏ်စွမ်းရည်ကိုတိုးစေပြီး စိတ်ဖိစီးမှုလည်းလျှော့ချပေးနိုင်ပါတယ်။ ဒါ့အပြင် မနက်စာကို သေသေချာချာနဲ့ပုံမှန်စားသုံးတဲ့သူတွေမှာ အာရုံစူးစိုက်မှုပိုမိုကောင်းမွန်တာကိုလည်းတွေ့ရပါတယ်။

ကျွန်တော်တို့ မြန်မာလူမျိုးတွေအများစုအနေနဲ့ကတော့ မနက်စာစားတဲ့အခါမှာ ထမင်းကိုပဲ အဓိကထားပြီး စားကြတာကိုတွေ့ရပေမဲ့ အာဟာရပညာရှင်တွေရဲ့ သုတေသနပြုမှုတွေမှာဆိုရင် အောက်ဖော်ပြပါအစားအစာတွေကိုလည်း အဓိကမနက်စာတွေအဖြစ် ထည့်သွင်းစားသုံးပေးသင့်တယ်လို့ သိရပါတယ်။ အဲဒီအစားအစာတွေကတော့ …

(၁) ဥအမျိုးမျိုး
ကျန်းမာရေးအတွက် အကျိုးကျေးဇူးတွေရရှိစေပြီး အရသာလည်းကောင်းမွန်တဲ့ ကြက်ဥ၊ ဘဲဥတို့လိုမျိုးအစရှိတဲ့ ဥအမျိုးမျိုးဟာဆိုရင် အဆာခံပြီးဗိုက်ပြည့်စေတာကြောင့် မနက်စာစားတဲ့အခါမျိုးမှာ မဖြစ်မနေဆိုသလိုထည့်သွင်းစားပေးသင့်တဲ့ အစားအစာမျိုးဖြစ်ပါတယ်။ ဒီလိုမျိုး ဥအမျိုးမျိုးတို့ကို မနက်စာစားတဲ့အချိန်မှာ အလျဉ်းသင့်သလိုစားသုံးပေးမယ်ဆိုပါက နောက်တစ်နပ်မှာစားသုံးမယ့် ကယ်လိုရီကိုလည်းလျှော့ချပေးရာရောက်သလို သွေးတွင်းသကြားဓာတ်ကိုလည်း ထိန်းညှိပေးပြီးသားဖြစ်တယ်လို့ ဆိုပါတယ်။ သုတေသနတစ်ခုမှတွေ့ရှိမှုအရဆိုရင်တော့ ဥအမျိုးမျိုးကို မနက်စာထဲမှာထည့်သွင်းစားသုံးကြတဲ့သူတွေဟာ ပေါင်မုန့်တွေ၊ ဒိုးနပ်တွေ စားသုံးကြတဲ့သူတွေအတွက် ဗိုက်၀စေတဲ့အပြင် ကယ်လိုရီစားသုံးမှုကလည်း ပိုမိုနည်းပါးတယ်လို့သိရပါတယ်။

(၂) ဒိန်ချဉ်
ဒိန်ချဉ်ကိုတော့ လူအများစုက နေ့ခင်းနေ့လည် (သို့မဟုတ်) ညနေစောင်းအချိန်တွေမှာ သရေစာတစ်ခုအနေနဲ့ စားသုံးလေ့ရှိကြပါတယ်။ ဒါပေမဲ့ ဒိန်ချဉ်မှာက အရသာရော၊ အာဟာရပါပြည့်စုံကြွယ်၀တဲ့ပြီး ခန္ဓာကိုယ်အတွက်အကျိုးပြုတဲ့ ဘက်တီးရီးယား (Probiotics) မနက်စာစားတဲ့အခါမှာ ဒိန်ချဉ်ကိုလည်း ထည့်သွင်းစားပေးသင့်တယ်လို့ ဆိုပါတယ်။ ဒါ့အပြင် ဒိန်ချဉ်စားသုံးပေးခြင်းဟာ ဆာလောင်မှုလည်းလျော့ကျစေသလိူ အဆီနဲ့ ကာဘိုဟိုက်ဒရိတ်တွေထက်လည်း ပိုမိုလောင်ကျွမ်းမှုအားကောင်းတာကြောင့် ဒိန်ချဉ်ကို တခြားအသီးအနှံတွေနဲ့ တွဲဖက်စားသုံးပေးမယ်ဆိုရင်တော့ ပြီးပြည့်စုံတဲ့မနက်စာကို စားသုံးခဲ့တယ်လို့ သတ်မှတ်နိုင်ပါတယ်။

(၃) ကော်ဖီ
တကယ်လို့ သင်က မနက်စာစားသုံးတဲ့အခါမှာ ကော်ဖီတစ်ခွက်ကို သောက်လေ့သောက်ထရှိတဲ့သူတစ်ယောက်ဆိုရင်တော့ ဒီအချက်က သင့်အတွက် ကိုက်ညီတယ်လို့ဆိုရမှာပါပဲ။ ကော်ဖီမှာပါဝင်တဲ့ ကဖိန်းဓာတ်ဟာဆိုရင် ဦးနှောက်ကိုကြည်လင်နိုးကြားပြီး လန်းဆန်း တက်ကြွစေတာကြောင့် မနက်စာစားတဲ့အချိန်မှာ ကော်ဖီတစ်ခွက်ကိုထည့်သွင်းသောက်သုံးပေးသင့်ပါတယ်။ ဒါပေမယ့် “တန်ဆေး လွန်ဘေး” ဆိုတဲ့စကားအတိုင်း မည်သည့်အရာကမှ အလွန်အကျွံမဖြစ်သင့်တာကြောင့် ကော်ဖီရဲ့အကောင်းဆုံးအာနိသင်ကိုရရှိစေဖို့က တစ်နေ့ကို ကဖိန်းဓာတ် ၃၈ မီလီဂရမ်ကနေ ၄၀၀ မီလီဂရမ်အထိသာ သောက်သုံးပေးသင့်ပါတယ်။ ကဖိန်းဓာတ်ဟာ ဇီ၀ဖြစ်ပျက်နှုန်းကို လျင်မြင်စေတဲ့အပြင် အဆီတွေကိုလည်း လောင်ကျွမ်းစေနိုင်ပြီး သုတေသနတစ်ခုရဲ့ တွေ့ရှိချက်အရတော့ ကဖိန်းဓာတ် ၁၀၀ မီလီဂရမ်ဟာ ၂၄ နာရီအတွင်းမှာ ကယ်လိုရီပမာဏ ၇၉ ကနေ ၁၅၀ အထိကို လောင်ကျွမ်းစေနိုင်တယ်လို့ သိရပါတယ်။

(၄) လက်ဖက်စိမ်းဖျော်ရည်
Green Tea လို့ ပိုမိုလူသိများတဲ့ လက်ဖက်စိမ်းဖျော်ရည်မှာဆိုရင်လည်း စိတ်ကိုကြည်လင်လန်းဆန်းစေတဲ့ ကဖိန်းဓာတ်တွေပါဝင်သလို ကိုယ်ခန္ဓာကိုယ်ရဲ့ ဇီ၀ဖြစ်ပျက်မှုကိုလည်း မြန်ဆန်စေတာကိုတွေ့ရပါတယ်။ Green Tea တစ်ခွက်မှာပါဝင်တဲ့ ကဖိန်းဓာတ်ပမာဏက ကော်ဖီမှာပါဝင်တဲ့ပမာဏရဲ့ တစ်ဝက်သာရှိပေမဲ့လည်း Green Tea ဟာ သွေးတွင်းသကြားဓာတ်ကို လျော့နည်းစေနိုင်တာကြောင့် ဆီးချိုသမားတွေအတွက် အသင့်တော်ဆုံးသောဖျော်ရည်တစ်မျိုးဖြစ်တယ်လို့လည်း ဆိုထားကြပါတယ်။

(၅) ချီယာစေ့
ခန္ဓာကိုယ်အတွက် လိုအပ်တဲ့အာဟာရဓာတ်တွေအပြင် အမျှင်ဓာတ်တွေလည်းကြွယ်၀စွာပါဝင်တဲ့ ချီယာစေ့ဟာဆိုရင်တော့ အစာခြေလမ်းကြောင်းထဲမှာ ရေကိုကောင်းစွာစုပ်ယူထားနိုင်တဲ့ အစားအစာတစ်မျိုးဖြစ်ပါတယ်။ ဒါကြောင့် ချီယာစေ့ကို မနက်စာထဲမှာ ထည့်သွင်းစားသုံးခြင်းက ဗိုက်ပြည့်နေသလိုခံစားရစေပြီး ဆာလောင်မှုကိုလည်းလျှော့ချပေးနိုင်တာကိုတွေ့ရပါတယ်။ ဒါ့အပြင် သွေးတွင်းမှာရှိတဲ့သကြားဓာတ်နဲ့ သွေးပေါင်ချိန်ကိုလည်းထိန်းသိမ်းထားနိုင်တာကြောင့် ချီယာစေ့ဟာ ဆီးချိုသမားတွေအတွက်တော့ သင့်တော်ပြည့်စုံတဲ့ မနက်စာတစ်မျိုးဖြစ်တယ်လို့ဆိုရမှာပါ။ ဒါပေမဲ့ ချီယာစေ့တစ်ခွက်မှာက ပရိုတင်းဓာတ် ၄ ဂရမ်သာပါဝင်တဲ့အတွက် သူချည်းပဲသီးသန့်စားသုံးဖို့ မသင့်တော်တာကြောင့် မနက်ခင်းမှာစားသုံးဖို့သင့်တော်တဲ့ တခြားသောအစားအစာတွေနဲ့ တွဲဖက်စားသုံးပေးရမှာဖြစ်ပါတယ်။

(၆) ဘယ်ရီသီးများ
အရသာကောင်းမွန်ရုံသာမက ဓာတ်တိုးဆန့်ကျင်ပစ္စည်းတွေလည်းပါဝင်တဲ့ စတော်ဘယ်ရီ၊ ဘလူးဘယ်ရီ၊ ဘလက်ဘယ်ရီ၊ ရက်(စ်)ဘယ်ရီတို့လိုမျိုး ဘယ်ရီသီးတွေဟာဆိုရင် တခြားသောအသီးအနှံတွေထက် သကြားဓာတ်ပါဝင်မှုနည်းပါးပြီး အမျှင်ဓာတ်ပါဝင်မှု များပြားတာကိုတွေ့ရပါတယ်။ ဒါ့အပြင် Anthocyanins ဓာတ်လည်းကြွယ်၀တာကြောင့် ဘယ်ရီသီးတွေစားသုံးခြင်းဟာ နှလုံးရောဂါနဲ့ တခြားကင်ဆာရောဂါဖြစ်ပွားမှုနှုန်းကိုလည်း လျော့နည်းစေကာ အရွယ်တင်နုပျိုဖို့အတွက် အထောက်အကူပြုပါတယ်။ ဒါကြောင့် မနက်စာစားသုံးတဲ့အခါမှာ ဘယ်ရီသီးကို ဒိန်ချဉ်တစ်ခွက်နဲ့ တွဲဖက်စားသုံးပေးသင့်ပါတယ်။

(၇) ဒိန်ခဲပျော့
အံအားသင့်ဖွယ်ကောင်းလောက်အောင် ပရိုတင်းဓာတ်တွေကြွယ်၀တဲ့ ဒိန်ခဲပျော့ဟာဆိုရင်တော့ ကယ်လိုရီပါဝင်မှုနည်းပါးတဲ့ အစားအစာတစ်မျိုးဖြစ်တာကြောင့် ဆာလောင်မှုကိုလည်းလျော့ပါးစေပြီး ကိုယ်အလေးချိန်ကိုလည်းထိန်းသိမ်းပေးနိုင်ပါတယ်။ အဆိုပါ ဒိန်ခဲပျော့ကိုတော့ ဘယ်ရီသီး၊ မက်မွန်သီး၊ ခရမ်းချဉ်သီး၊ ချီယာစေ့တို့လိုမျိုး တခြားအာဟာရဓာတ်ပြည့်၀တဲ့ အစားအစာတွေနဲ့ တွဲဖက်စားသုံးပေးသင့်ပါတယ်။

(၈) ပေါင်မုန့်မီးကင်
တကယ်လို့ သင်က မနက်စာအတွက် အချိန်သေချာမပေးနိုင်တဲ့သူ (သို့မဟုတ်) ပေါ့ပေါ့ပါးပါးနဲ့ လွယ်ကူရိုးရှင်းတဲ့ မနက်စာမျိုးကိုမှ စားလေ့စားထရှိသူ၊ ကြိုက်နှစ်သက်သူဆိုရင်တော့ ပေါင်မုန့်မီးကင်က သင့်အတွက် ရွေးချယ်စားသုံးသင့်တဲ့ မနက်စာတစ်မျိုးဖြစ်ပါတယ်။ ဂျုံနဲ့ပြုလုပ်ထားတဲ့ ပေါင်မုန့်မီးကင်မှာဆိုရင် အမျှင်ဓာတ်တွေနဲ့ ကာဗိုဟိုက်ဒရိတ်ဓာတ်တွေကြွယ်၀စွာပါဝင်ပြီး အဆိုပါဓာတ်တွေကို ချေဖျက်ဖို့ဆိုတာက အချိန်အနည်းငယ်မျှကြာမြင့်တာကြောင့် သွေးတွင်းသကြားဓာတ်ပမာဏကို လျင်မြန်စွာမြင့်တက်ခြင်း မဖြစ်စေပါဘူး။ ယင်းပေါင်မုန့်မီးကင်ကိုတော့ ကြက်ဥကြော်၊ ခရမ်းချဉ်သီး၊ ထောပတ်သီး၊ မြေပဲနှစ်၊ ငှက်ပျောသီး၊ ဒိန်ခဲပျော့၊ စတော်ဘယ်ရီ၊ ပျားရည်၊ တူနာငါး၊ ကြက်သားအစရှိတဲ့ အစားအစာတွေ စားချင်စဖွယ်ဖြစ်အောင် ပြင်ဆင်ပြီးသုံးဆောင်နိုင်ပါတယ်။

(၉) လက်ဖက်စိမ်းဖျော်ရည်
လူတွေအများစုက မနက်စာစားသုံးတဲ့အခါမှာ လက်ဖက်ရည်နဲ့ ကော်ဖီတို့ကိုသာ ဖျော်ရည်တွေအဖြစ်သုံးဆောင်လေ့ရှိကြတာကို တွေ့ရပါတယ်။ တကယ်တော့ လက်ဖက်စိမ်းဖျော်ရည်ဟာဆိုရင်လည်း မနက်စာအဖြစ်နဲ့ သုံးဆောင်နိုင်တဲ့ဖျော်ရည်တစ်မျိုးဖြစ်ပြီး ယင်းလက်ဖက်စိမ်းထဲမှာဆိုရင် စိတ်ကိုလန်းဆန်းတက်ကြွစေတဲ့ ကဖင်းဓာတ်တွေပါဝင်တာကိုတွေ့ရပါတယ်။ ဒါ့အပြင် စိုးရိမ်ပူပန်မှုကိုလည်းလျှော့ချပေးနိုင်တဲ့ L-theanine ဒြပ်ပေါင်းပါဝင်မှုကလည်းမြင့်မားပြီး နှလုံးရောဂါ၊ ဆီးချိုရောဂါနဲ့ စိတ်ကျရောဂါတို့လိုမျိုး နာတာရှည်ရောဂါဖြစ်ပွားမှုကို ကာကွယ်ပေးတဲ့ ဓာတ်တိုးဆန့်ကျင့်ပစ္စည်းတွေလည်းပါဝင်တယ်လို့ သိရပါတယ်။

(၁၀) သစ်သီး၀လံများ
သင့်အနေနဲ့ မနက်စာကိုပမာဏအများကြီး မစားချင်ပေမဲ့လည်း တစ်စုံတစ်ခုကိုစားသုံးချင်တဲ့စိတ်ကတော့ ဖြစ်ပေါ်နေတယ်ဆိုပါက သစ်သီး၀လံတွေက သင့်အတွက် အကောင်းဆုံးရွေးချယ်မှုဖြစ်တယ်လို့ ဆိုနိုင်ပါတယ်။ အသီးအနှံတွေအားလုံးမှာ ကယ်လိုရီပါဝင်မှုက နည်းပါးပြီး အမျှင်ဓာတ်နဲ့ အချိုဓာတ်လျော့နည်းတဲ့ သကြားဓာတ်တွေပါဝင်မှုူရှိတယ်ဆိုပေမယ့် အသီးအနှံအမျိုးအစားအလိုက် ပါဝင်တဲ့ ဗီတာမင်ဓာတ်နဲ့ သတ္တုဓာတ်တွေကတော့ ကွဲပြားတာကိုတွေ့ရပါတယ်။ ဥပမာ လိမ္မော်သီး၊ မာလကာသီး၊ ကီဝီသီး၊ စတော်ဘယ်ရီသီး၊ သင်္ဘောသီး၊ ချယ်ရီသီးနဲ့ လိုင်ချီးသီးတို့မှာဆိုရင် အရေပြားကျန်းမာရေးအတွက် အဓိကအရေးကြီးတဲ့အခန်းကဏ္ဍမှပါဝင်ပြီး ဗီတာမင်စီဓာတ်တွေမြင့်မားတဲ့ ဓာတ်တိုးဆန့်ကျင်ပစ္စည်းတွေပါဝင်ကာ ငှက်ပျောသီးနဲ့ သခွားမွှေးသီးတို့မှာတော့ ပိုတက်ဆီယမ် ဓာတ်တွေကြွယ်၀စွာပါဝင်လို့နေပါတယ်။

ဒီလောက်ဆိုရင်တော့ မနက်စာစားသုံးခြင်းကြောင့်ရရှိလာနိုင်တဲ့ အကျိုးကျေးဇူးတွေနဲ့ မနက်စာစားတဲ့အခါမှာ ဘယ်လိုမျိုးအစားအစာတွေကို ရွေးချယ်စားသုံးသင့်လဲဆိုတာကို သိရှိလောက်ကြပြီထင်ပါတယ်နော်။ နောက်တစ်ပတ်တင်ဆက်ပေးသွားမဲ့ “Health Tips” အစီအစဉ်မှာရော ဘယ်လိုကျန်းမာရေးဗဟုသုတအကြောင်းအရာတွေကို ဖော်ပြပေးသွားဦးမလဲဆိုတာကို စောင့်မျှော်အားပေးကြပါဦး။ ဖတ်ရှုပေးခဲ့ကြတဲ့ ပရိသတ်တစ်ယောက်ချင်းဆီကိုကျေးဇူးတင်ရှိပြီး သာယာပျော်ရွှင်စရာကောင်းတဲ့ နေ့ရက်လေးကိုပိုင်ဆိုင်နိုင်ကြပါစေလို့လည်း ဆုတောင်းပေးလိုက်ပါတယ်။